Data u Ħin:
Il-Ġimgħa 14 ta’ April 2023, 9pm

Il-baħar huwa firxa miftuħa, fejn ix-xewqat u l-ħolm tagħna jibbilanċjaw fuq orizzont blu.

Bħala gżejjer, l-identità tagħna hija inkorporata fil-blat – id-djar, il-bliet u t-tempji tagħna huma mibnija minn ġebla tal-franka kulur l-għasel. Il-kampanja ta’ garigue imqaxxar testendi u tinfirex bil-mod, f’bajjiet dehbina tar-ramel, jew tinżel f’daqqa f’mijiet ta’ metri ta’ irdum tal-ġibs. Hawnhekk id-dar, is-sens ta’ insularità jista’ jkun ta’ konfort. Nafu l-bidu u t-tmiem tagħna. Nistgħu nħossu t-truf ta’ artna.

Huwa l-baħar li jippermettilna nittraxxendu u niftħu moħħna. Aħna port minn fejn salpajna u nerġgħu lura lejn kenn. Fuq il-mewġ aħna nitħallew nesploraw il-kożmo.