Il-qassis Luteran Lucas (Elliott Crosset Hove) ġie assenjat mill-Knisja tad-Danimarka biex iwaqqaf paroċċa fir-reġjuni salvaġġi u aridi tal-Iżlanda. Spirtu temerarju, hu jiddeċiedi li jaqbad rotta diffiċli tul il-kampanja, kontra x-xewqa tal-gwida u ta’ dak li daqt se jkun il-ġar tiegħu, Ragnar (Ingvar Sigurðsson), li saħansitra jkollu jġorru lejn id-destinazzjoni tagħhom meta l-qassis jaqa’ minn fuq iż-żiemel tiegħu. B’qalb mimlija kuraġġ, Lucas jibda xogħlu, iżda jsib poplu lokali li mhuwiex lest li jaċċetta l-proposti spiritwali tiegħu. Matul dan kollu, Lucas jibqa’ mistgħaġeb u mgerfex bis-sbuħija u l-indifferenza tad-dinja naturali. Hekk kif jifhem li l- lingwa hija ostaklu bejnu u l-kongregazzjoni potenzjali tiegħu, Lucas jara l-pajsaġġ bħala xi ħaġa feroċi li jrid jimmansa.

Il-film akklamat ta’ Pálmason A White, White Day (2019), afferma r-reputazzjoni tiegħu bħala produttur tal-films li jagħti importanza lil dettalji li jolqtu l-għajn. Hawnhekk, imur oltre billi joħloq dinja ta’ sbuħija traxxendentali li hija madankollu bla ħniena ma’ dawk li jippruvaw jgħixu fiha. Is-solennità tal-istil tal-produttur tal-film taqbel mal-istorja tiegħu. Din ġiet inkwadrata ġewwa format Akkademiku b’kantunieri fit-tond li, aktar milli jsaħħu l-kobor ta’ dan il-pajsaġġ miftuħ, iżidu l-inkwiet u l-ansjetà li wieħed jista’ jħoss f’dinja mingħajr l-ebda fruntiera viżibbli.