MedFilm in Malta 2022
- This event has passed.
MedFilm in Malta 2022
L-ewwel edizzjoni ta’ MedFilm f’Malta – Aħna nħobbu l-baħar, organizzata minn Costantino Films Ltd b’kollaborazzjoni mal-MedFilm Festival ta’ Ruma, ippresedut minn Ginella Vocca u Giovanni Costantino, hija parti minn sħubija internazzjonali mal-festivals tal-films ta’ Formentera, Palma de Mallorca, Menorca, Ortigia, Alghero u l-Montenegro u appoġġjata minn National Geographic.
MedFilm f’Malta għandu l-mira li jikkombina l-imħabba għaċ-ċinema ma’ dik għall-ambjent u, b’mod partikolari, il-protezzjoni tal-baħar. Barra minn hekk, għandu l-ħsieb li jġiegħel “ix-xtajtiet kulturali kollha tal-Baħar Mediterran isiru jafu lil xulxin u jistabbilixxu djalogu”.
It-tema tal-Mediterran u tal-bosta kulturi tiegħu huwa stimolu biex nerġgħu nikkunsidraw min aħna u x’inhu l-potenzjal tagħna. Dan huwa għaliex se nippreżentaw tmien xogħlijiet (erba’ films twal u erba’ films qosra) direttament mill-MedFilm Festival ta’ Ruma, li issa huwa fis-27 edizzjoni tiegħu.
Flimkien mal-erba’ dokumentarji ta’ National Geographic u bl-għajnuna tat-tim ta’ Eco Marine Malta (li se jitkellem fi tmiem il-wirjiet), aħna se ninvestigaw l-isbuħija u l-fraġilità tal-baħar tagħna, parti mill-kobor tal-oċeani imma wkoll il-fulkru tal-kulturi tagħna.
Bl-appoġġ tal-Kunsill Malti għall-Arti
Informazzjoni fuq il-Biljetti
Informazzjoni fuq il-Post
Informazzjoni Addizzjonali
Il-Ġimgħa, 21 ta’ Jannar 2022, 4pm
Programm tal-Films Qosra ta’ MedFilm
Il-films kollha huma bil-lingwa oriġinali bis-sottotitoli bl-Ingliż
Tul: 1hr
Ċert: n/a
Il-films qosra fil-programm huma: “La Petite”, “Li Paradisi” ,”Le Bain” u “Sukar”
La Petite
Petite hija tifla żgħira, l-unika tifla fir-raħal tagħha. Hija tippassiġġa f’nofs is-Saħara, waqt li tivvinta l-logħob f’oażi li qiegħda tmut. Ġurnata minnhom, hija tiskopri post li huwa popolat minn persuni għomja: huma l-aħħar superstiti mit-test ta’ “Gerboise Bleue.”
Amira-Géhanne Khalfallah twieldet fl-1975 u trabbiet fl-Alġerija. Hija gradwata fil-bijoloġija ċellulari u molekulari, madankollu qiegħda xxaqleb lejn il-kitba. Ilha tgħix fil-Marokk mill-2007 u hija wkoll ġurnalista li tispeċjalizza fil-kultura. Wara żewġ films qosra, hija kitbet u żviluppat l-ewwel film twil narrattiv tagħha The Return of the Jerboas li għandu t-tema tal-kwistjoni tat-testijiet nukleari fis-Saħara fis-sittinijiet u l-ħsarat tagħhom. La Petite rebaħ il-Premju Methexis bħala l-Aqwa Film Qasir fil-MedFilm tal-2020.
Li Paradisi
Lucia hija s-sid ta’ masġar taż-żebbuġ tal-familja, The Heavens, flimkien ma’ ħuha Donato, imma s-siġar tagħha waqfu jipproduċu bħalma kienu qabel minħabba parassita li kkawżat li l-maġġoranza tas-siġar jinxfu. Fi proċess diffiċli ta’ aċċettazzjoni, Lucia tibda vjaġġ bejn il-preżent u l-passat fejn l-identità tagħha bħala bniedma tinsab f’riskju.
Manuel Marini twieled f’Salento (l-Italja) fl-1988 u trabba f’Ruma. Waqt l-istudji tiegħu fin-Netherlands huwa ħadem ma’ bosta produzzjonijiet tal-films u beda jidderieġi l-vidjos tal-mużika. Fl-2015 Manuel gradwa bi grad ta’ Baċellerat fil-Komunikazzjoni f’Amsterdam u mar lura Ruma biex jistudja l-kitba għall-iskrin. Fl-2016, huwa ħa sehem f’kors tad-Direzzjoni fl-EICTV f’Kuba. Fl-2017 il-film qasir tiegħu Olvidate de eso miġbud kollu f’Ħavana l-Qadima, intgħażel minn ħafna festivals tal-films madwar id-dinja. Fl-2018 huwa ntgħażel mill-aġenzija tar-reklamar 72andSunny ta’ Los Angeles biex ikun membru tat-tim kreattiv internazzjonali tagħha.
Sukar
Ix-xtajta ta’ Casablanca, il-Marokk. Il-passjoni b’saħħitha ta’ żewġ adoloxxenti għal xulxin qiegħda tikber b’mod sigriet fl-isfond. L-adulti u t-tfal josservaw. Ġlieda mhux mistennija toħloq opportunità għal devjazzjoni.
Ilias El Faris twieled f’Agadir fl-1990, u issa jgħix f’Pariġi. Huwa rritorna b’kamera Super 8 f’Taghazout, ir-raħal tat-tfulija tiegħu, biex jiġbed Azayz, l-ewwel film qasir tiegħu, magħżul fil-MedFilm u f’bosta festivals (EMAF, Coté Court, Journées Cinématographiques de Carthage, Tous-courts, Maghreb des Films) u ppremjat bil-Premju tal-Ġurija Internazzjonali f’DocLisboa tal-2016. Ilias huwa wkoll il-koawtur għall-iskrin tal-film qasir La Petite, dirett minn Lorenzo Bianchi, u ppremjat waqt il-Clermont-Ferrand Film Festival tal-2016. Fl-2018 huwa dderieġa l-film qasir Roujoula, li ntwera fil-Kompetizzjoni fil-MedFilm. Sukar rebaħ il-premju Cervantes għall-Aqwa Film Qasir Kreattiv (ex-aequo ma’ Ruby ta’ Mariana Galvão) fil-MedFilm tal-2020.
Le Bain
Imed isib ruħu waħdu għal ġurnata ma’ ibnu ta’ ħames snin, Hedi, minħabba l-vjaġġ għal skopijiet ta’ negozju ta’ martu. Hija l-ewwel darba li għandu jieħu ħsieb lill-ibnu waħdu. Dan l-avveniment komuni u sempliċi fil-ħajja ta’ familja jqanqal memorji ta’ wġigħ u mudlama mill-passat: Imed ikollu jikkonfronta l-akbar biża’ tiegħu.
B’missier Tuneżin u omm Franċiża-Taljana, Anissa Daoud hija attriċi, produttriċi u direttriċi. Hija ħadet sehem f’numru ta’ films li għalihom irċeviet bosta premjijiet. Hija produċiet il-films qosra Law of the Lamb ta’ Lotfi Achour u All the Rest Is the Work of Man ta’ Doria Achour. Hija dderiġiet żewġ dokumentarji, Women’s Chronicles of Political Engagement u Our Women in Politics and Society. Fl-2018 hija koderiġiet il-film qasir Best Day Ever ma’ Aboozar Amini bħala parti mid-Directors’ Fortnight’s Tunisia Factory. Bħalissa qiegħda tiżviluppa l-ewwel film twil tagħha Les Imortel(le)s.
Il-Ġimgħa, 21 ta’ Jannar, 2022, 6pm
Regina
Lingwa: Taljan b’sottotitli bl-Ingliż
Tul: 1 hr 25 min
Ċert: 15
Regina, tfajla ta’ 15-il sena li tilfet lil ommha snin qabel, toħlom li ssir kantanta. Missierha, Luigi, l-unika familja tagħha f’dak il-punt, jemmen bis-sħiħ fit-talent ta’ bintu u jappoġġjaha bla waqfien. Wara kollox, Luigi kien ċeda l-karriera mużikali tiegħu stess biex ikun viċin bintu. Ir-relazzjoni tagħhom tidher soda, indissolubbli, sakemm avveniment mhux mistenni jibdel ħajjithom.
Il-Ġimgħa, 21 ta’ Jannar 2022, 9pm
Miss Marx
Ċert: 15
Lingwa: Ingliż
Tul: 1hr 48min
Mimlija entużjażmu, intelliġenti, iddedikata u ħielsa, Eleanor hija t-tifla ż-żgħira ta’ Karl Marx. Hija kienet fost l-ewwel nisa li għaqqdet it-temi tal-feminiżmu u s-soċjaliżmu u hija ħadet sehem fil-ġlidiet tal-ħaddiema u dawk għad-drittijiet tan-nisa u l-abolizzjoni tax-xogħol għat-tfal. Fl-1883 hija ltaqgħet ma’ Edward Aveling u ħajjitha titkisser minħabba storja ta’ mħabba mimlija passjoni imma traġika.
Susanna Nicchiarelli twieldet f’Ruma fl-1975. Hija għandha dottorat fil-Filosofija mis-Scuola Normale Superiore ta’ Pisa, u fl-2004 hija gradwat fid-Direzzjoni tal-Films fiċ-Centro Sperimentale di Cinematografia. Wara xi films qosra u dokumentarji, hija dderiġiet l-ewwel film tagħha fl-2009, Cosmonauta, li kien ir-rebbieħ tal-Controcampo fil-Venice Film Festival u nominat għad-David di Donatello għall-Aqwa l-Ewwel Film Twil. Aktar tard hija dderiġiet Discovery of Dawn (2012) u Nico, 1988 (2017), l-Aqwa Film f’Orizzonti fil-Venice Film Festival, rebbieħ ta’ ħafna premjijiet internazzjonali, inkluż erba’ David di Donatello. Miss Marx iddebutta fil-Kompetizzjoni fil-Venice Film Festival tal-2020 u rebaħ tliet premjijiet David di Donatello.
Is-Sibt, 22 ta’ Jannar 2022, 11.30am
Heroes of the Mediterranean – flimkien ma’ Mistoqsijiet u Tweġibiet ma’ Eco Marine Malta
Lingwa: Ingliż
Ċert: n/a
Tul: 47 min
Il-Bijoloġista tal-Baħar u l-Esploratur ta’ National Geographic Manu San Felix jinvestiga l-effett devastanti li l-bnedmin kellhom fuq il-Mediterran Spanjol, u jiltaqa’ ma’ dawk li jagħmlu kollox biex ireġġgħu lura l-ħsara.
Is-Sibt, 22 ta’ Jannar 2022, 2.30pm
Ocean’s Breath – flimkien ma’ Mistoqsijiet u Tweġibiet ma’ Eco Marine Malta
Lingwa: Ingliż
Ċert: n/a
Tul: 46 min
Fil-fond tal-ilmijiet tal-oċeani tagħna, bosta żoni ta’ qroll li jsostni l-ħajja qegħdin ikunu fgati b’rata allarmanti. Imħeġġa mis-sitwazzjoni terribbli, żewġ esploraturi tan-National Geographic jibdew vjaġġ li jiftaħ l-għajnejn fuq il-passat, il-preżent u l-futur tas-sikek tal-qroll, ifittxu soluzzjonijiet li jgħinu biex isalvaw lil dawn il-ħlejjaq antiki mill-estinzjoni.
Is-Sibt, 22 ta’ Jannar 2022, 5.30pm
“Sea Of Hope: America’s Underwater” – flimkien ma’ Mistoqsijiet u Tweġibiet ma’ Eco Marine Malta
Lingwa: Ingliż
Ċert: n/a
Tul: 47 min
Sea of Hope hija avventura ta’ azzjoni miġbuda b’mod tajjeb ħafna li ssegwi l-leġġenda tal-oċean Sylvia Earle, il-fotografu ta’ taħt l-ilma magħruf ta’ National Geographic Brian Skerry, il-kittieb Max Kennedy u l-kru tagħhom ta’ akwanawti adoloxxenti fuq tfittxija ta’ sena biex jużaw ix-xjenza u l-fotografija biex jispiraw lill-President Obama jistabbilixxi Parks Blu madwar postijiet fis-Salvaġġ Amerikan li ma jidhrux.
Is-Sibt, 22 ta’ Jannar 2022, 9pm
Gaza Mon Amour
Lingwa: Għarbi bis-sottotitoli bl-Ingliż
Ċert: 15
Tul: 1hr 30min
Gaża, illum. Issa, sajjied ta’ sittin sena, iħobb lil Siham, mara divorzjata li taħdem bħala ħajjata fis-suq. Fl-aħħar, meta jkun iddeterminat li jipproponilha, huwa jiskopri statwa antika tal-bronż ta’ Apollo fix-xibka tas-sajd tiegħu, li jiddeċiedi li jaħbi d-dar. Meta l-Ħamas jiskopru l-eżistenza ta’ dan it-teżor misterjuż, jibdew il-problemi għal Issa… Se jirnexxilu jiddikjara l-imħabba tiegħu lil Siham?
Arab u Tarzan Nasser huma aħwa tewmin imwielda f’Gaża fl-1988, sena wara li ngħalqu l-aħħar swali taċ-ċinema fil-belt. It-tnejn li huma gradwaw b’Baċellerat tal-Belle Arti fil-pittura mill-Università al-Aqsa ta’ Gaża qabel ma’ daru lejn il-produzzjoni tal-films bil-films qosra Colourful Journey (2010) u Condom Lead (2013), l-ewwel film qasir Palestinjan magħżul għall-kompetizzjoni uffiċjali f’Cannes. Wara Apartment 10/14 (2014) u With Premeditation (2014), Arab and Tarzan idderieġew l-ewwel film twil tagħhom Dégradé (2015), magħżul fil-kompetizzjoni fil-Ġimgħa tal-Kritiċi Internazzjonali ta’ Cannes. Gaza mon amour rebaħ il-Premju Amore & Psiche bħala l-Aħjar Film fil-MedFilm tal-2020.
Il-Ħadd, 23 ta’Jannar 2022, 11am
“Pristine Seas: The Power of Protection” – flimkien ma’ Mistoqsijiet u Tweġibiet ma’ Eco Marine Malta
Tul: 44 min
Lingwa: Ingliż
Ċert: n/a
L-Esploratur Residenti ta’ National Geographic, Enric Sala, nieda l-proġett Pristine Seas fl-2008 sabiex jesplora u jgħin jispira l-protezzjoni tal-aħħar postijiet tas-selvaġġ fl-oċean.
Mis-sikek tal-qroll tal-Palau sal-icebergs tal-Artiku Russu, il-filmat speċjali ta’ siegħa, Pristine Seas: The Power Of Protection, isegwi tim waqt li jivjaġġa madwar il-globu f’tellieqa kruċjali sabiex jgħinu biex isalvaw l-oċean tagħna—qabel ma jkun tard wisq.
Il-Ħadd, 23 ta’Jannar 2022, 8.30pm
À l’abordage!
Ċert: 12
Lingwa: Franċiż bis-sottotitoli bl-Ingliż
Tul: 1hr 35min
F’lejl sħun sajfi f’Pariġi, Félix jiltaqa’ ma’ mara żagħżugħa, Alma, u jsir iħobbha. L-għodwa ta’ wara, Alma tirkeb fuq ferrovija biex tingħaqad mal-familja tagħha fin-Nofsinhar ta’ Franza. Félix, determinat li jsegwi lill-imħabba ta’ ħajtu, jibda vjaġġ kondiviż mal-aqwa ħabib tiegħu Chérif u s-sewwieq tagħhom li huwa bla ħeġġa. Waqt li l-karozza tiġrilha l-ħsara meta jaslu, l-affarijiet jaqilbu għall-agħar. Alma ma tkunx daqshekk kuntenta b’din iż-żjara mhix mistennija.
Guillaume Brac gradwa minn La Fémis fil-produzzjoni u dderieġa u pproduċa l-ewwel film qasir tiegħu Stranded fl-2009, imbagħad il-film ta’ tul medju A World Without Women fl-2011, li rebaħ premjijiet f’bosta festivals fi u barra Franza. Fl-2012, dawn iż-żewġ films, ikkombinati fi programm wieħed, inħarġu fi Franza fejn intlaqgħu b’suċċess kritiku u pubbliku kbir. Fl-2013, Brac idderieġa l-ewwel film twil tiegħu, Tonnerre, ippreżentat fil-Kompetizzjoni f’Locarno. Imbagħad idderieġa Rest for the Braves, ippreżentat fl-2016 f’FID Marseille u mxandar fuq Ciné+, u July Tales, ippreżentat f’Locarno fl-2017. Treasure Island (2018) rebaħ il-Premju Amore & Psiche bħala l-Aqwa Film fil-MedFilm tal-2018. À l’abordage! rebaħ il-Premju għall-Aqwa Espressjoni Artistika fil-MedFilm tal-2020.
Il-patruni kollha li se jattendu avvenimenti fi Spazju Kreattiv għandhom jippreżentaw ċertifikazzjoni tal-vaċċin fil-punt tad-dħul tagħhom.