Mediterrane Film Festival
- This event has passed.
Mediterrane Film Festival
Il-Mediterrane Film Festival huwa ċelebrazzjoni tal-films u l-kreattività li tiġbor flimkien l-aqwa tar-reġjun Mediterranju u lil hinn minnu. Imwaqqaf fl-2023, l-avveniment annwali jsir fil-gżejjer sbieħ ta’ Malta u għandu l-għan li jgħaqqad il-pajjiżi biex irawwem il-kollaborazzjoni, l-opportunità, u l-imħabba komuni għall-films.
Il-festival juri films eċċezzjonali mir-reġjun u jservi bħala pjattaforma għall-prodotturi tal-films, professjonisti tal-industrija, u dilettanti biex jagħmlu konnessjonijiet, jiskambjaw ideat, u joħolqu sħubijiet għal proġetti futuri.
Nocturnes
Data u Ħin: It-Tnejn, 24 ta’ Ġunju fl-4.30PM
Tul: siegħa 22 minuta (82 minuta)
Lingwa: Ħindi, Ingliż, Bugun
Esperjenza ta’ wiri immersiva ta’ ħsejjes u xbihat, il-film jinseġ flimkien xenarju kkomplikat u poetiku tad-dinja tagħna. L-ekoloġista Mansi tibda tfittxija biex tistudja l-baħrija f’wieħed mill-aktar postijiet vibranti fid-dinja. Hija tingħaqad ma’ Bicki, żagħżugħ mill-komunità indiġena ta’ Bugun, biex tfittex ħjiel dwar dak li l-futur għandu lest għall-baħrijiet.
Flimkien, Mansi u Bicki jaqsmu l-pajsaġġ, jaħdmu bir-reqqa lejl wara lejl biex ipoġġu skrins tad-dawl li jittrasformaw f’kanvas dinamiku b’baħrijiet ta’ daqsijiet, disinji u nisġa differenti, u joħolqu effett ta’ pittura bil-forma, il-moviment u l-kulur tagħhom. Sadanittant, il-bnedmin jistennew, jaraw u jisimgħu b’antiċipazzjoni paċenzjuza u għaġeb.
Billi jiffoka fuq ħlejqa żgħira, effimera, ta’ bil-lejl bħall-baħrija, NOCTURNES ifittex li jsaqsi dwar ħarsa tad-dinja ċċentrata fuq il-bniedem. Il-foresta ffollata, mogħnija b’diversità vasta ta’ ħajja, toħroġ bħala karattru li jaqtagħlek in-nifs hekk kif il-film jirrispondi għas-sinfonija tal-ħsejjes u r-ritmi inerenti tas-siġar, tar-riħ u x-xita. Ir-riżultat huwa esperjenza rari u trasformattiva li tistedinna lkoll biex inħarsu b’aktar attenzjoni u kura lejn l-interkonnessjonijiet moħbija fin-natura.
Who Do I Belong To
Data u Ħin: It-Tnejn, 24 ta’ Ġunju fis-7:00 PM
Tul: 118-il minuta
Lingwa: Għarbi
Aicha, omm Tuneżina b’don ta’ ħolm profetiku, tgħix f’razzett rurali ma’ żewġha Brahim u tliet ulied. Il-ħajja ta’ Aicha u Brahim inbidlet kompletament wara t-tluq ta’ wliedhom il-kbar, Mehdi u Amine, ġewwa l-morsa vjolenti tal-ISIS. Wara li għexu ħajjithom biss għal uliedhom, Aicha u Brahim isibu ruħhom bla bażi u jippruvaw jagħmlu sens tar-realtà ġdida kerha.
Ftit xhur wara, Mehdi jirritorna d-dar ma’ mara tqila jisimha Reem. In-niqab u s-silenzju ta’ Reem ifixkel ħafna lil Brahim. Aicha, min-naħa l-oħra, trid tipproteġi lil Mehdi u lil Reem akkost ta’ kollox.
Sadanittant, il-wasla ta’ Mehdi tqanqal ġrajjiet strambi ġewwa r-raħal. Aicha hija wisq ikkunsmata biex tipproteġi lil binhi li bilkemm tinnota l-biża’ li qed tiżdied fil-komunità. Aicha trid tegħleb l-imħabba għamja tagħha għal Mehdi sabiex tiskopri l-verità wara d-dlam dejjem jikber.
My Way
Data u Ħin: It-Tlieta, 25 ta’ Ġunju fl-4:00 PM
Tul: siegħa 18-il minuta (78 minuta)
Vjaġġ konvinċenti lejn il-qalba ta’ kanzunetta emblematika li tesplora l-appell universali u l-wirt fit-tul tal-klassika prontezza.
Sweet Dreams
Data u Ħin: It-Tlieta, 25 ta’ Ġunju fil-5:30 PM
Tul: siegħa 42 minuta (102 minuti)
Lingwa: Olandiż, Indoneżjan
Fi gżira remota Indoneżjana fl-aħħar jiem tal-era kolonjali, sid il-pjantaġġun Olandiż Jan u martu l-marida Agathe jinsabu fil-quċċata tal-katina tal-ikel. Il-fabbrika taz-zokkor tagħhom rat żminijiet aħjar, l-istess bħaż-żwieġ tagħhom, iżda jolqothom diżastru meta Jan jirritorna minn festa eżuberanti mingħand il-konkubina tiegħu Siti, biex jaqa’ u jmut quddiem martu.
Iddisprata li żżomm il-privileġġi tal-istatus quo tagħha, Agatha teħles mill-katavru ta’ żewġha bil-moħbi u ġġiegħel lil binha Cornelis sabiex jiġi mill-Ewropa u jieħu f’idejh in-negozju tal-familja.
Miegħu Cornelis iġib lil martu tqila u mfissda Josefien flimkien ma’ ideat progressivi għall-ħaddiema tal-pjantaġġuni u tal-fabbrika. Hekk kif id-dinja kolonjali l-antika qiedgħa tiġġarraf u l-Indoneżjani indiġeni jiksbu l-poter, jirriżulta li l-ideali huma fieragħ u li d-demm ma jsirx semm meta jiġi żvelat li Jan ħalla l-proprjetà tal-familja lit-tifel ta’ għaxar snin li kellu barra miż-żwieġ, mal-indiġena, Siti.Wara d-debutt tagħha Take Me Somewhere Nice (RIFF Special Jury Award / Cannes ACID) & IMPORT (Cannes Quinzaine) Ena Sendijareviç tgħaqqad satira li ma taħfirx ma’ estetika lussuża f’logħba tal-ġurdien u l-qattus li tiddokumenta l-mewta traġika u delizzjuża tal-kolonjaliżmu Ewropew.
Negu Hurbilak
Data u Ħin: L-Erbgħa, 26 ta’ Ġunju fl-4:30 PM
Tul: siegħa 30 minuta (90 minuta)
Lingwa: Bask
Fl-2011, il-kunflitt armat fit-tul fil-Pajjiż Bask jidher li qed jintemm. Żagħżugħa taħrab b’għan ċar: li taqsam il-fruntiera, il-“muga”. Hi taf li dan se jeħodha lil hinn mid-dar u mill-għeruq tagħha, fejn m’għadhiex sigura. Waqt il-ħarba tagħha, hija tasal f’Zubieta, raħal fil-fruntiera fejn miti antiki u kunflitti moderni jidhru li jingħaqdu flimkien. Moħbija fl-attiku ta’ waħda mid-djar fir-raħal, hi tibda tosserva ħajja ta’ kuljum li ma tinbidilx.
Iż-żmien jgħaddi – pajsaġġ imċajpar u indefinit fejn il-ġranet jiċċajpru f’iljieli u ljieli fi ġranet. Il-ħarba tagħha ssir dejjem labirint akbar, u tinbela’ kompletament ġewwa ċpar dens…
Meeting With Pol Pot
Data u Ħin: L-Erbgħa, 26 ta’ Ġunju fis-7:00 PM
Tul: siegħa 52 minuta (112 minuta)
Lingwa: Franċiż, Khmer
Kampuchea Demokratika (Kambodja) – 1978. Tliet ġurnalisti Franċiżi huma mistiedna mill-Khmer Rouge sabiex jagħmlu intervista esklussiva mal-mexxej tar-reġim, Pol Pot. Il-pajjiż jidher ideali. Iżda wara r-raħal Potemkin, ir-reġim tal-Khmer Rouge qiegħed ibatti u l-gwerra mal-Vjetnam qed thedded li tinvadi l-pajjiż. Ir-reġim qed ifittex għal dawk ħatja, billi b’mod sigriet iwettaq ġenoċidju fuq skala kbira. Quddiem għajnejn il-ġurnalisti, l-istampa sabiħa tibda tixxaqqaq u tiżvela l-orrur. Kull ma jmur il-vjaġġ tagħhom jinbidel f’ħolma kerha. Ispirat liberalment mir-rakkont tal-ġurnalista Elizabeth Becker f’When The War Was Over.
Link għat-Trailer ta’ Youtube: https://www.youtube.com/watch?v=LzJCnxiMEFQ
Palazzina Laf
Data u Ħin: Il-Ħamis, 27 ta’ Ġunju fl-4:30 PM
Tul: siegħa 39 minuta (99 minuta)
Lingwa: Taljan
Taranto, 1997. Caterino, ħaddiem sempliċi fil-kumpless industrijali ta’ Ilva, jiġi reklutat b’mod sigriet bħala whistleblower mill-ogħla ġestjoni tal-kumpanija sabiex jiċċekkja l-impjegati u l-ħaddiema li ma jogħġbux lill-amministrazzjoni l-ġdida tan-negozju. Waqt l-attivitajiet ta’ spjunaġġ tiegħu, inkapaċi jħoss lir-rwol tiegħu bħala wieħed mhux etiku, Caterino jitlob li jiġi rilokat f’Palazzin Laf, fejn xi ħaddiema jiġu kkastigati billi ma jkollhomx dmirijiet u responsabbiltajiet. Anki jekk jidher qisu l-ġenna, Caterino se jsir jaf waħdu li hija strateġija perversa applikata mill-maniġment tal-kumpanija biex timmanipula psikoloġikament ħaddiema li jikkawżaw l-inkwiet, sabiex jimbuttawhom biex jirriżenjaw jew jinżlu grad. Fi żmien qasir, ir-raġel ikollu jagħżel bejn l-obbidjenza lejn il-fabbrika u r-relazzjonijiet ta’ ħbiberija li jkun stabbilixxa ma’ nies li jkollu jrid jikkontrolla. Ibbażat fuq storja vera, huwa l-ewwel każ uffiċjali ta’ mobbing u bossing fl-Italja.
The Strangers’ Case
Data u Ħin: Il-Ħamis, 27 ta’ Ġunju fis-7:00 PM
Tul: siegħa 37 minuta (97 minuta)
Lingwa: Għarbi, Ingliż, Grieg
F’Sir Thomas More, Shakespeare kiteb diskors li fih More jagħmel difiża mqanqla għar-refuġjati, jitlob għall-empatija minn sħabu u jilħaq il-qofol tiegħu f’deskrizzjoni kompensiva tal-qagħda mwiegħra tar-refuġjati – “The Strangers’ Case” – li tippersisti llum.
Tabiba u bintha jiġu d-dar wara xift kaotiku fi sptar ġewwa Aleppo. F’nofs ċelebrazzjoni ta’ għeluq is-snin, iż-żewġ nisa huma mġiegħla jieħdu deċiżjoni diffiċli li se tbiddel ħajjithom u r-relazzjoni tagħhom għal dejjem.
Suldat jesperjenza reati faħxija lejn l-irġiel, nisa u tfal fis-servizz tar-reġim Sirjan. Hekk kif il-vjolenza u l-korruzzjoni teskala, isib ruħu jevalwa mill-ġdid l-umanità tiegħu stess.
Kuntrabandist fit-Turkija jipprova b’mod iddisprat biex ilaħħaq minħabba ibnu. Fi sforz biex iġemma’ biżżejjed flus biex jaffordjaw il-ħarba tagħhom stess, huwa jirranġa għall-passaġġ lejn il-Greċja fuq ċattri tas-salvataġġ li jintefħu għar-refuġjati f’kamp fil-qrib għal prezz għoli.
Poeta li rnexxielu jasal għas-sigurtà ta’ kamp tar-refuġjati Tork bil-familja żagħżugħa tiegħu jpartat għal spazju fuq dgħajsa ffullata żżejjed, li tiġi mbuttata ’l barra f’ibħra mqallba, lejn il-Greċja.
Kaptan tal-gwardji tal-kosta Griega iqatta’ l-ġranet u l-iljieli tiegħu jsalva dgħajjes tas-salvataġġ li qed jegħrqu mimlijin migranti ’l barra mill-kosta ta’ Lesvos, kontinwament maħkum minn dawk li ma kienx kapaċi jsalva.
The Rye Horn
Data u Ħin: Il-Ġimgħa, 28 ta’ Ġunju fl-4:30 PM
Tul: siegħa 43 minuta (105 minuti)
Lingwa: Spanjol
1971, Spanja Frankista. Fil-kampanja tal-Galizia, Maria tassisti lin-nisa waqt it-twelid. Wara attentat biex tgħin żgħażugħa fl-inkwiet, f’daqqa waħda hi trid tistaħba mill-awtoritajiet, tħalli kollox warajha u taħrab mill-pajjiż.
Fil-vjaġġ perikoluż tagħha lejn il-Portugall, Maria tiltaqa’ mas-solidarjetà femminili u tirrealizza li mhijiex waħedha u li, grazzi għall-għajnuna ta’ ħaddieħor, tista’ fl-aħħar issib il-libertà tagħha.
Link għat-Trailer ta’ Youtube: https://www.youtube.com/watch?v=o-vP0pEIvxI
Hayat
Data u Ħin: Il-Ħadd, 30 ta’ Ġunju fis-2:00 PM
Tul: 3 sigħat 13-il minuta (193 minuta)
Lingwa: Tork
“Fl-1985 kelli xogħol indendel posters tar-reklamar f’pompi tal-petrol madwar l-Anatolja kollha. F’ħin minnhom waqt il-vjaġġi tiegħi, sibt ruħi nistenna l-karozza tal-linja fi triq mitluqa ftit barra raħal. Faċċata tat-triq innutajt tfalja tistenna ħdejn ħanut żgħir tal-merċa, imdejqa daqs kemm kont jiena. Bdejna billi għamilna kuntatt bl-għajnejn u mbagħad malajr inġarrejna mill-mument.
Wara ftit, waslet tal-linja. Jien tlajt fuqha u naturalment qatt ma erġajt rajt lit-tfajla. Ma tantx niftakar dwar il-post jew kemm domna hemm; imma qatt ma nsejt dik il-laqgħa, is-solitudni tat-tifla u l-uġigħ profond li ħassejt mingħajr ebda raġuni.”
“Hayat” hija storja li jiena ktibt ispirata minn din il-memorja, minn stejjer li esperjenzajt, rajt u smajt matul is-snin, u minn osservazzjonijiet tul il-ħajja. Għalkemm jista’ jkollha d-dehra ta’ drama taż-żgħażagħ u tal-familja ambjentata fi ħdan grupp speċifiku ta’ nies, hija fundamentalment storja antika dwar id-destin tal-bniedem, id-dgħjufija tagħna quddiemu, u s-sens ta’ impossibbiltà kbira li jmur magħha.
Link għat-Trailer ta’ Youtube: https://www.youtube.com/watch?v=4MPAbrvQxQA
Informazzjoni fuq il-Biljetti
Informazzjoni fuq il-Post
