Wara sensiela ta’ spettakli Live in HD mill-aqwa, is-sopran Norveġiża, Lise Davidsen, tirritorna fil-Metropolitan Opera bħala Leonore, il-mara leali li tirriskja kollox biex issalva lir-raġel tagħha minn taħt idejn it-tirannija f’Fidelio ta’ Beethoven. It-tenur Brittaniku, David Butt Philip, bħala l-priġunier politiku Florestan, il-baxx-baritonu Pollakk, Tomasz Konieczny, bħala l-villan Don Pizarro, il-baxx veteran Ġermaniż, René Pape, bħala l-uffiċjal tal-ħabs Rocco, is-sopran Ċiniża, Ying Fang, u t-tenur Ġermaniż, Magnus Dietrich, fil-parti taż-żgħażagħ Marzelline u Jaquino, u l-baxx Daniż, Stephen Milling, bħala n-nobbli Don Fernando jiffurmaw il-kumplament tal-kast mill-aqwa. Susanna Mälkki tmexxi l-ispettaklu tal-15 ta’ Marzu, li se jiġi trażmess b’mod dirett mill-palk tal-Met ġewwa s-swali taċ-ċinema madwar id-dinja.