Migration Nation hija magħmula minn proġett estensiv u wirja li tħares lejn l-impatt tal-bniedem fuq id-dinja minħabba l-migrazzjoni klimatika, xogħol l-artista Maltija Iella li tgħix Londra.

Min ma semax jew ġarrabx il-livelli tal-ibħra telgħin, avvenimenti ta’ temp estrem, u l-iskarsar tar-riżorsi naturali? Dawn saru parti mill-ħajja ta’ ħafna nies madwar id-dinja kollha. Ħafna drabi, dawn ma jkollhomx għażla oħra għajr jitilqu minn darhom u jfittxu ambjenti aktar siguri. Migration Nation tindirizza din ir-realtà. Tagħmel dan billi tinterpreta b’mod uman, mimili emozzjoni, ġrajjiet li huma kbar, inkalkulabbli u ta’ spiss mhux mifhuma sew. Il-ħuttaf u għasafar oħra jieħdu post il-bnedmin bħala vjaġġaturi li jakkumpanjawna tul il-wirja. Pitturi kbar bl-akriliku u xogħol ta’ tnaqqix elaborat magħmula minn Iella jiftħulna panorami ta’ ċaqlieq epokali. Ix-xbihat iqanqlu fina ħsus ta’ empatija għal min jitlef daru u jagħfsu fuq l-isfidi komuni tal-umanità.

Flimkien ma’ xogħol Iella l-artist mistieden Christian de Souza Jensen (magħrfuf bħala SeaPuppy) ser juri xogħol animat ġdid. Xogħlu jtenni s-sejħa għall-ġustizzja klimatika u mġieba xierqa lejn il-migranti. F’xogħol imtella’ flimkien mal-Komunità Maltija tal-Illustraturi, tmiem il-wirja tirrifletti istint kollaborattiv frott tal-att fiżiku tal-bini ta’ struttura permezz ta’ ħafna kontribuzzjonijiet li jwasslu l-messaġġ ta’ solidarjetà u empatija lejn min hu anqas ixxurtjat minna. Il-pubbliku mistieden jagħti sehmu f’dil-istallazzjoni.

Ix-xogħol tal-wirja nħoloq Londra u Sydney, fejn l-artista qattgħet residenza twila fl-2023. Malta għandha sehem permezz ta’ referenzi għax-xtut Mediterranji, il-luzzi u l-għasafar li jpassu minn fuq Malta. Din hija storja universali dwar problemi eżistenzjali, dwar il-bniedem u kull ħlejqa f’did-dinja.

Tim Kreattiv:

Artista u maniġment tal-proġett: Iella (Daniela Attard)
Kuratriċi: Margerita Pulè
Artist mistieden: SeaPuppy (Christian de Souza Jensen)
Kollaboraturi: il-Komunità Maltija tal-Illustraturi, Clara Azzopardi, Zoe Briffa, Jessica Cutajar, Shanice Farrugia, Kath Flask, Miriam Galea, Mel Grech, Zoe Marsh, Ellie Scerri, Matthew Schembri, Moira Scicluna Zahra, Naomi Smith, Steffi Venturi, Kyle Xuereb Cunningham

Imtella’ bl-appoġġ tal-Kunsill Malti għall-Arti

Avvenimenti addizzjonali:

Tour kuratorjali segwit mit-tnedija tal-katalgu u taħdita tal-artist.

L-Erbgħa, 25 ta’ Settembru, 7pm – 8.30pm

Ikklikkja hawn biex tirreġistra

Attività ta’ Halloween għat-Tfal (5-7 snin) – Workshop tat-tiwi tal-karti *(MA FADALX POST)*

Is-Sibt, 2 ta’ Novembru, 11 AM – 12 PM

Ingħaqad mal-artist u d-disinjatur ‘iella’ għal attività u workshop tat-tiwi tal-karti – tgħallem kif titwi l-karta f’dgħajjes, għasafar u forom oħra biex tikkontribwixxi għall-installazzjoni tal-komunità fuq skala kbira f”Migration Nation’. Għal Halloween se nitgħallmu wkoll kif jintwew friefet il-lejl u critters oħra tat-tkessiħ. Ideali għal tfal ta’ bejn 5-7 u kull adult li jakkumpanja.

It-tfal iridu jkunu akkumpanjati minn adulti f’kull ħin waqt l-attività.

Ikklikkja hawn biex tirreġistra